Сагосен шокиран од условите во Египет: Ова е „див запад“

Светското ракометно првенство денеска официјално започна во Египет, а од утре својот прв настап ќе го имаат повеќе селекции, меѓу кои и македонската.

Покрај публиката која во меѓувреме беше елиминирана од ИХФ, ракометарите се плашеа и од условите кои ќе ги обезбеди африканскиот домаќин, нешто што сега го потврдуваат и репрезентативците кои се подготвуваат за своите настапи на мундијалот.

Најдиректен засега бил предводникот на Норвежаните, Сандер Сагосен, кој за медиумите од својата земја открил какви се условите во Египет.

– Ова е трагикомично, вистинска трагикомедија, се досега изгледа како добра шега.

– Вакви услови се неприфатливи, вчера бевме шокирани кога стигнавме, а денес е уште полошо. Имавме тренинг на мало парче трева, веќе им го кажав моето мислење на оние кои се задолжени за организацијата, – изјавил Сагосен.

Норвешкиот репрезентативец е изненаден и од фактот што не функционира најавениот „меур“ на ИХФ во хотелот каде се сместени.

– Не знам ни дали ова може да се нарече „меур“, луѓе доаѓаат и си одат без маски, сите јадеме заедно. Ништо не е под контрола, не се чувствуваме сигурни и можеме само да се молиме да не се заразиме. Ова е „див запад“, – потенцира Сагосен.

Норвежаните утре го започнуваат настапот на СП со дерби натпревар против Франција.