Руска тенисерка ги изигра правилата и ќе настапи на Вимблдон!

Организаторите на Вимблдон поддржани од британската влада решија да забранат настапи на сите тенисери и тенисерки од Русија и Белорусија на новото издание на престижниот турнир, но непосредно пред да почнат официјалните подготовки за големото натпреварување, пристигна една интересна и необична вест.

Имено, една руска тенисерка успеа да ги изигра правилата и сепак ќе настапи на Вимблдон, откако во период од неколку седмици реши да го искористи правото на друго државјанство.

Русинката Натела Ѕаламидѕе реши да го промени државјанството неполни десет дена пред почетокот на Вимблдон и со тоа ја издрибла забраната за настап на играчи од Русија.

Тенисерката која е 44-та во дубл конкуренција ќе се појави на лондонската трева во Ол Ингланд Клубот бранејќи ги боите на Грузија, а ќе се натпреварува во игра на двојки со Србинката Александра Круниќ.

Натела го искористила правото да стане Грузијка поради потеклото на еден од родителите, па со ова ги задоволила потребите на организаторите на Вимблдон и ќе настапи на 135-то издание на тенискиот турнир.