Руд повторно најде решение за Руне и втора година по ред ќе игра полуфинале во Париз

Каспер Руд втора година по ред ќе игра во полуфиналето на Ролан Гарос, и тоа го направи со нова победа над својот скандинавски ривал, Холгер Руне.

Двајцата имаа доста тешка и тензична четвртфинална пресметка на Френч Опен пред една година, па иако овојпат страстите беа доста помирни, Руд беше оној кој беше поприбран и подобар на теренот.

Каспер мина како фурија во првите два сета и истите ги доби со 6:1 и 6:2, што беше јасен сигнал дека Руне мора да направи коренети промени за да остане во мечот.

Младиот Данец успеа да покажа дел од најдобрата игра и се врати во игра во третиот сет, но и покрај тоа што го доби истиот со 6:3, сепак на крајот доживеа исто сценарио како лани.

Во репризата на четвртфиналето, Руд повторно славеше со 3:1 бидејќи го доби четвртиот сет со 6:3, па така одново се најде меѓу четирите најдобри тенисери во Париз.

Полуфиналињата се играат во петок и во првото силите ќе ги одмерат Карлос Алкарас и Новак Ѓоковиќ, додека Руд ќе игра против Саша Зверев.