Роси си подаде рака со нов тим во Мото ГП, има опција да вози и во 2022. година

Валентино Роси на крајот на оваа сезона која воопшто не ни започна ќе остане без место во фабричкиот тим на Јамаха кој ќе го сочинуваат Вињалес и Квартараро, но сепак ова нема да значи крај на неверојатната и блескава кариера на Италијанецот.

Популарниот „Ил Доторе“ нема да има можност да ја донесе својата одлука според остварените резултатите на патеката, но фактот што Јамаха го поддржува во секој поглед, Валентино сега се согласил на навистина атрактивен договор кој му бил понуден од сателитскиот тим на Јамаха.

Всушност станува збор за малезискиот тим Петронас Јамаха, кој на Роси му понудил договор за останување во Мото ГП во 2021-ва година, но со опција истиот да биде продолжен и во 2022-ра доколку покаже задоволувачки перфораманси.

Веста за договорот меѓу двете страни ја пренесе угледниот италијански медиум специјализиран за мотоциклизам „GPOne“, кој додава дека Италијанецот ќе ужива во спецификации на мотоциклот како оние на фабричката Јамаха, се со јасна цел да биде идентично конкурентен како Вињалес и Квартараро.

Во исчекување на официјална потврда на оваа информација, веќе познато е дека тимски колега на деветкратниот шампион во Петронас ќе биде Морбидели.