Роналдо за оправдувањата на Тен Хаг: Тренер на Јунајтед не смее да го изјави тоа!

Ерик Тен Хаг постојано бара време од раководните структури на Манчестер Јунајтед и тврди дека тимот е на вистински пат со него, но барем засега, навивачите на англискиот великан не можат да се израдуваат на некои поголеми успеси под водство на холандскиот стручњак.

Тен Хаг го објаснува своето преземање на Јунајтед како долг процес кој може да трае со години, а во своите изјави доста често вели дека нереално е неговиот тим да се бори за титулите во Премиер лигата и Лигата на шампиони.

Јунајтед сериозно заостанува зад најдобрите во последните неколку години и не е ниту блиску до борбата за големи трофеи, па така во последните две сезони со Тен Хаг се задоволи со титули во Карабао и ФА Купот.

Размислувањето на Тен Хаг често се наоѓа на удар во јавноста, а сега со јавна критика се јави и Кристијано Роналдо во заедничкиот поткаст со Рио Фердинанд.

– Манчестер Јунајтед мора да почне да менува од корен и тоа е јасно. Ќе им треба време за да се вратат, но тоа останува еден од најголемите клубови во светот. За да се случи тоа, потребни се големи промени. Сите во клубот го знаат тоа и само така ќе успеат да направат исчекор.

– За мене несфатливо е тоа што го вели менаџерот на Јунајтед. Тренерот вели дека не можат да се борат за првото место во Премиер лигата и во Лигата на шампионите. Тренер на Јунајтед не смее да го изјави тоа. Дури и да го мисли тоа, треба да се обиде да го промени и да не дава таква слика во јавноста. Менталитетот мора да биде друг, мора да се мисли дека има потенцијал за нешто повеќе. Кога сте во Јунајтед, мора да се обидете да бидете најдобар, – вели Роналдо.