Роналдо со мотивирачка порака до сонародниците, Сантош верува во титула!

Откако вчера и селекторот на Португалија, Фернандо Сантош, го објави списокот со 26 повикани фудбалери за Мундијалот во Катар, од медиумите беа забележани и високите амбиции во изјавите кои следуваа.

Предводникот на тимот, Кристијано Роналдо, ќе игра на своето петто светско првенство, а во првото огласување по официјалната потврда на неговиот мундијалски билет, испрати порака до сонародниците дека целата нација е повикана.

– Уште еднаш, подготвен сум да го прославиме името на Португалија! Господин Фернандо Сантош има 26 имиња во неговиот список, но целата земја е поканета! Напред Португалија!,- напиша Кристијано.

Uma vez mais, prontos para elevar bem alto o nome de Portugal! São 26 os nomes na lista do Mister Fernando Santos, mas estamos todos convocados! Força Portugal!💪🏽🙏🏽 pic.twitter.com/ZYrmIs4deq

— Cristiano Ronaldo (@Cristiano) November 10, 2022

Роналдо има постигнато 117 голови за репрезентацијата и ова може да биде негов последен настап на светските фудбалски самити. Прв пат заиграл на светските првенства во 2006 година (Германија), а потоа учествувал на сите следни натпреварувања во Јужна Африка, Бразил и Русија. Во последните три настапи за националниот тим нема постигнато гол (Србија, Турција, Македонија), но селекторот Сантош има полна доверба во него.

– Кристијано играше на нашите последни четири натпревари. Во моментов настапува и игра. Сите фудбалери што ги имам повикано доаѓаат гладни за победа и со цел да ја освоиме титулата светски шампиони, вклучително и Роналдо. Верувам дека тоа е можно и дека овој тим може тоа да го оствари,- изјави Сантош.

Покрај Роналдо во тимот ќе игра уште еден „ветеран“ со 39 години, Пепе, кој е одбранбен столб на Порто. Покрај него, повикан е 19-годишниот дефанзивец на Бенфика, Антонио Силва. Поради повреди од тимот отсуствуваат Диого Жота (Ливерпул) и Педро Нето (Волверхемптон).

Португалија ја започнува својата кампања со пријателски меч против Нигерија на 17 ноември. Во Катар првиот натпревар го играат на 23 ноември со Гана, а потоа играат со Уругвај и Јужна Кореја.