Рома му закажа медицински прегледи на Хумелс, но очекува пристигнување на уште еден познат стопер

Еден ден по завршувањето на летниот преоден рок, Даниеле Де Роси посочи дека Рома не е комплетна во одбраната, но во тој момент никој не можеше да замисли дека ќе следи ремонт во овој дел каков што се случува во престолнината во изминативе неколку дена.

„Волчицата“ успева целосно да го обнови одбрабениот ред со слободни агенти и во овие три дена договори две добро познати имиња, но сега на пат е да врати и еден играч кој во минатото важеше за стол во одбраната на Рома.

Клубот од „Олимпико“ веќе го претстави Марио Ермосо кој пристигна како слободен агент откако му заврши договорот со Атлетико Мадрид, за денеска му закажа медицински прегледи на Матс Хумелс кој доаѓа како директна замена за Крис Смолинг кој заврши во Саудиска Арабија, но операциите сепак нема да завршат тука.

Како што јавуваат угледните италијански новинари, Рома успеала да договори и трет познат слободен агент, а тоа е Костас Манолас.

Гркот ги договорил сите детали со Рома за враќање на „Олимпико“ после пет години, бидејќи не треба да се заборави дека Манолас беше клучен фактор во дефанзивниот дел на „волчицата“ од 2014-та до 2019-та година.