Рома гордо се пофали со потписот на најдобриот стрелец во Ла Лига (Видео)

Даниеле Де Роси доби нов договор од Рома и доби шанса да го продолжи проектот кој го стартуваше на крајот од минатата сезона, со тоа што сега амбициите ќе бидат уште поголеми.

Легендарниот капитен на Рома сега како тренер бара максимално залагање од своите фудбалери и воочи дека има недостаток на квалитет, па така газдите на клубот решија доста брзо да ја исполнат неговата најголема желба.

„Волчицата“ имаше проблеми со реализацијата и затоа Де Роси побара нов напаѓач, а човекот кој го доби навистина е еден од најрасположените голгетери во Европа.

Артем Довбик беше пред трансфер во Атлетико Мадрид, но колебањето кое го покажаа „душекџиите“ околу висината на трансферот направи Рома да дојде во пол-позиција за ангажман.

Римскиот клуб ги исполни сите барања на Џирона и во трансфер кој може да достигне максимални 38,5 милиони евра го договори украинскиот напаѓач, а Рома преку официјалното соопштение гордо се пофали дека клубот за првпат во историјата купува напаѓач кој бил најдобар голгетер во едно друго европско национално првенство (Украинецот постигна 24 гола во Ла Лига).

Рома засега не откри детали на колку години е потпишан договорот, но се знае дека Довбик ќе ја носи „11-та“ во првиот тим.

Signed, sealed, delivered. ✍️🇺🇦#ASRoma pic.twitter.com/8YgEccqrOQ

— AS Roma English (@ASRomaEN) August 2, 2024