Рома го комплетираше невообичаениот трансфер и испиша историја во Серија А

Рома и фановите на римскиот клуб во еден момент го прифатија како реалност дека ќе го загубат Пауло Дибала поради богатата понуда од Саудиска Арабија, но не само што Аргентинецот направи филмски пресврт и остана, туку во Рим пристигна фудбалер од оваа азиска земја.

„Волчицата“ вечерва го промовираше за свој нов член Сауд Абдулхамид, фудбалер кој може да игра на двете бековски позиции и кој доаѓа од редовите на Ал Хилал, актуелниот шампион на Саудиска Арабија.

Рома ќе плати симболични 2,5 милиони евра со евентуални бонуси од половина милион, а овој трансфер е историски бидејќи Абдулхамид е првиот фудбалер од Саудиска Арабија кој ќе настапува во Серија А.

Новата 12-ка на Рома има 26 настапи за својата репрезентација и беше дел од неа на СП во Катар, вклучувајќи ја историската победа над Аргентина.

Деновиве се очекува Ал Хилал да го промовира Жоао Кансело како ново име во своите редови и замена за Абдулхамид кој пак ќе го чека своето деби за Рома можеби уште на дербито со Јувентус.

🪑👋🇸🇦 pic.twitter.com/tRhCE4Ompb

— AS Roma (@OfficialASRoma) August 27, 2024