Родриго призна дека знае да се налути: Повремено се чувствувам како да „пополнувам дупки“ во Реал

Бразилецот Родриго во интевјруто за „ЕСПН“ призна дека бил ироничен со својот коментар што не се најде на листата на најдобрите 30 фудбалери кои конкурираат за „Златната топка“, но во истиот разговор фудбалерот на Реал Мадрид говорел и за својата улога во клубот, која често знае да биде потценета од медиумите.

Карло Анчелоти го смета Родриго за еден од најважните играчи во Реал и тоа се обидува да го потенцира од време на време, не само поради фактот што Бразилецот игра одлично во напад, туку и поради фактот што е офанзивен фудбалер кој знае да помага и во одбрана.

Италијанецот тоа посебно го потенцираше на стартот на оваа сезона во ситуација кога Реал е многу поофанзивно ориентиран, а Родриго е посебно ценет од Дон Карло и поради фактот што честопати знае да биде играч кој „пополнува дупки“.

Од својот старт за првиот тим за Реал, Родриго играше на сите позиции во нападот, па иако признава дека тоа повремено го вознемирува, сепак приоритет му дава на колективниот успех.

– Од време на време, јас сум играчот кој пополнува дупки во нападот. Недостасува некој лево, пополнува Родриго, недостасува некој десно, тука е Родриго. Фали „9-ка“ во нападот, тука е Родриго. Тоа е тоа, понекогаш знае да ме вознемири, но јас сум тимски играч и секогаш сум тука да одговорам за доброто на тимот, – вели Родриго.