Родриго: Анчелоти знае дека не сакам да играм како напаѓач, но го правам тоа за него

Родриго полека излегува од кризата која ја имаше на стартот на сезоната и тоа го потврди на дербито против Валенсија, на кое успеа да постигне два гола и да забележи две асистенции.

Бразилецот влегува во голгетерски ритам и тоа е позитивна вест за Карло Анчелоти и навивачите на Реал Мадрид, особено поради тоа што тимот покажа дека знае да дава голови и без Џуд Белингем во тимот.

Трите гола во мрежата на Брага и петте во мрежата на Валенсија се добар доказ за тоа, но и покрај се подоброто движење во завршната зона, Родриго уште еднаш нагласи дека не ужива да игра како „деветка“ во системот на Анчелоти.

– Вистина е дека бев опседнат со тоа што не постигнував голови, но полека се враќам во ритам. Не обвинував никого, тоа беше моја вина. Се адаптирав на нова позиција и се уште се приспособувам. Сега добив и малку повеќе слобода да се движам лево и десно. Тешко ми е да играм како „9-ка“, но тренерот верува дека можам да го правам тоа.

– Анчелоти знае дека не сакам да играм како напаѓач, но јас верувам во него и играм на таа позиција поради него. Тој е како татко за мене, секогаш ми помага и ми даваше поддршка на стартот на оваа сезона кога ми беше доста тешко, – изјави Родриго.