Родри ја „запали“ Шпанија со својата изјава: Ако ви се јави Реал Мадрид…

Церемонијата по повод „Златната топка“ која се одржа во Париз донесе фудбалска историја на крајот на минатиот месец, бидејќи само вторпат откако се доделува индивидуална награда за најдобар светски играч, наградата замина во раце на шпански фудбалер.

Родри стана вториот Шпанец во историјата кој го подигна најпрестижното признание кое му се доделува на еден играч, па иако во последно време беше преокупиран со интервјуа поврзани за оваа тема, сега во разговорот за „Кадена Сер“ првпат се огласи за својата иднина.

Ѕвездата на Манчестер Сити вели дека би немал никакви проблеми да ја заврши кариерата и во Англија, но сепак желба му е еден ден да се врати дома и да се повлече во Шпанија.

– Лесно би прифатил да ја завршам кариерата во Англија, оваа земја ми даде се на фудбалски план. Но, Шпанија е моја земја и би сакал да се вратам дома. Секогаш ги следам случувањата во Ла Лига и свесен сум дека квалитетот расте од година во година. Ако треба да бирам клуб во кој би сакал да се пензионирам, тоа е Вилјареал, – изјави Родри, кој потоа добива прашање дали би разгледал опција од Реал Мадрид ако добие понуда од Флорентино Перез.

– Ако ви се јави Реал Мадрид, најдобриот клуб во историјата и најтрофејниот во историјата, тоа претставува голема чест и мора да обрнете внимание на таква понуда, – гласи одговорот на Родри.