Родри: Имам конкретна цел за камбекот, но не смеам да направам грешка

Манчестер Сити е во голема резултатска криза, a еден од најголемите проблеми на Пеп Гвардиола е отсуството на Родри, актуелниот освојувач на признанието „Златна топка“.

Шпанецот ги скина лигаментите и ќе се рехабилитира неколку месеци, но во последното подкаст гостување потврдил дека не се откажува од актуелната сезона.

Родри има повеќе време за медиумите, па во најновото интервју открил каков план има за својот камбек.

– Мојата цел е да се вратам сезонава, не се откажувам од оваа сезона.

– Очекувам паузата да трае шест, седум месеци, но јасно е дека не сакам и не смеам да направам грешка.

– Се држам подобро од што очекував и сега го правам се она за што немам време додека активно играм, – истакнал шпанскиот репрезентативец.

Родри има дополнителна мотивација околу камбекот и поради Светското клупско првенство кое следното лето ќе се одржи во САД.