Робертсон: Не го сакам Меси во Премиер лигата, се надевам…

Еден од најдобрите леви бекови на светот, Енди Робертсон не сака Лионел Меси да направи трансфер во клуб од Премиер лигата.

Меси не сака да остане во Барселона, бара да си замине од клубот во кој е капитен, а една од најсериозните опции за него е преселба во англискиот прволигаш Манчестер Сити.

-Од потполно себично гледиште, се надевам дека тоа нема да се случи, се надевам дека тој ќе остане во Барса. Тој е еден од најдобрите ако не и најдобар играч кој ја играл оваа игра, па неговото доаѓање во најблискиот ривал не е добар знак. Тој е фантастичен играч, не се сомневам дека ако дојде во Премиер лигата ќе донесе  ист квалитет, иста страст и сè што носи во Барса.

-Мислам дека Ливерпул ја отфрли опцијата за негов потпис, па за мене, воопшто не го сакам во близина на Премиер лигата и се надевам дека така ќе остане, но ќе почекаме и ќе видиме што ќе се случи со тоа. Очигледно може да се види неизвесноста во Барса, мислам дека секој може да го види тоа и се надевам дека тоа ќе го решат. Ако дојде во ПЛ ќе се справиме со тоа, ќе биде одлично за момците да играат против него.

-Играв двапати против него и тоа се најтешките мечеви што сум ги играл, треба постојано да внимаваш против него, тој може да се појави од никаде. Тој е фантастичен играч, веројатно најдобриот во историјата на фудбалот, ама се надевам ќе остане во Шпанија, -порача Робертсон.