Ривалдо прогнозира каква ќе биде реакцијата на фановите на Барселона доколку Меси на крајот остане на „Камп Ноу“

Шпанските медиуми најавуваат дека адвокатите на Меси во наредните неколку часа ќе излезат со официјално соопштение околу иднината на Аргентинецот, а додека сите со нетрпение го очекуваат гласилото на претставниците, со интересен осврт се јави легендарниот Ривалдо.

Незаборавниот бразилски виртуоз и фудбалска легенда на Барселона редовно ги коментира случувања во неговиот омилен клуб, па како амбасадор на „Бетфер“, овој петок излезе со нова анализа за најкоментираната тема во фудбалската јавност во изминативе десетина дена.

– Ако Меси на крајот одлучи да продолжи во Барселона, тоа нема да претставува никаков проблем. Фановите го обожаваат и знаат дека тој е играчот кој прави разлика на теренот. Нема да има никаков проблем, дури и да се вратат фанови на трибините, никој нема да го свирка. Не верувам дека ќе се случи такво нешто, – започнува Ривалдо и додава.

– Сигурен сум дека Меси рекол „доста“ по понижувањето од Баерн Минхен. Тоа ја прели чашата кај него, но незадоволството трае подолго време. Веќе навистина долго време само тој е одговорен за се што се случува на теренот. Понижувањето на Баерн ја прели чашата, но незадоволството има позначајна позадина. Клубот доведе многу играчи во изминативе преодни рока, но ниту еден не истапи и не му помогна на Меси, никој не му помогна да има мало олеснување, – анализира Бразилецот кој смета дека Реал Мадрид ќе биде чекор пред Барселона и во ситуација Лео да остане во клубот.

– Реал Мадрид беше супериорен во однос на Барселона и со Меси во тимот, замислете што ќе се случи ако си замине. Разликата ќе биде огромна меѓу двата тима во овој момент ако Лео си замине, – тврди Ривалдо.