Ривалдо бара да се вратат двајца ветерани во бразилската репрезентација: Тоа се големи имиња…

Бразил игра катастрофално во јужноамериканските квалификации за пласман на Светското првенство кое во 2026 година ќе се одржи во три држави Мексико, Канада и Соединетите Американски Држави.

Бразилците по осум кола имаат остварено само три победи, односно оваа селекција на претходните пет средби има дури четири порази од кои последниот дојде против Парагвај со 1-0.

Овие резултати се разочарувачки, има многу криткики за целиот тим, селекторот, играчите, па легендарниот Ривалдо се обиде да понуди едно решение во актуелнава ситуација.

Ривалдо смета дека мора да се најде место за поискусни играчи, односно верува дека во националниот тим треба да се вратат Тиаго Силва и Хулк кои имаат по 39 и 38 години, но имаат добри партии за своите клубови во домашниот бразилски шампионат.

-Според она што го видов на вчерашниот натпревар, ако го повикате Хулк, дури и да не е за Светското првенство, тој би бил огромна помош во овие квалификации. Тиаго Силва би можел да се врати во ваков тим за да ни помогне полесно да се квалификуваме. Тие се големи имиња кои би биле добри во моментот, можат да се справат со притисокот на овие натпревари и притисокот од медиумите.

-Имаме многу истакнати играчи во Бразил кои веќе имаат играно за националниот тим. Хулк би играл многу добро против овие тимови во квалификациите, гледајќи како тренира и како се подготвува, би имал големи шанси да се врати во националниот тим во ова време, -смета Ривалдо кој е разочаран од Винисиус Жуниор, Родриго, Пакета, Маркињос и компанија.

-Ова не е тимот што навивачите и фудбалските фанови сакаат да го гледаат. Ова е многу лоша екипа. Тимот минува низ многу комплицирани и тешки времиња. Тажен е поразот од Парагвај кој има многу инфериорен тим во однос на Бразил, а го разлути бразилскиот народ. Ама играчите треба да продолжат, нема начин да се заобиколи. Нема враќање назад. Мора да размислуваме за Чиле на гостински терен кој минува низ многу лош момент.

-Ако загубиме од Чилеанците, ќе биде уште покомплицирано, бидејќи сме се поблиску до стартот на Мундијалот и веќе треба да бидеме многу поподготвени и усогласени. Во тој момент, другите тимови веќе би биле загрижени за Бразил, -порача славниот ас за „Бетфер“.