Ристовски и Адеми добија нов тренер, италијански стручњак ќе седне и на клупата на Динамо

Ненад Бјелица не успеа да ја задржи тренерската позиција во редовите на Динамо и по само неколку месеци хрватскиот шампион реши да направи нова тренерска смена.

Лошата резултатска серија во домашното првенство му пресуди на Бјелица, кој вторпат добива отказ од загрепскиот клуб, а сезонава го наследи Сергеј Јакировиќ.

Динамо соопшти дека тренерската позиција ја презема поранешниот италијански репрезентативец, Фабио Канаваро, кој првпат ќе води тренинг на „модрите“ на 3. јануари.

Канаваро досега не може да се пофали со посебни резултати како тренер во Европа, додека во фудбалските денови освои многу трофеи, а ја доби и „Златната топка“ во 2006 година.

Под водство на Бјелица, Динамо играше добро во Лигата на шампионите, но загуби многу бодови во домашното првенство, па тимот на нашите Ристовски и Адеми сега ќе се обиде да ја стопи предноста на Хајдук и Ријека.