Ридигер откри на кој натпревар го сфатил значењето на Реал Мадрид

Реал Мадрид задутре ќе го пречека Челси во четвртфиналето на Лигата на шампионите, а Антонио Ридигер е фудбалер кој дојде во Шпанија токму од редовите на премиерлигашот.

Германскиот дефанзивец во опширното интервју за „Марка“ зборувал на повеќе теми, вклучувајќи го и начинот на кој најдобро го разбрал реномето на Реал во европски рамки.

– Во Реал си под притисок уште кога ќе влезеш во автомобил за да се упатиш на тренинг.

– Сепак, тоа не е негативно, мене ми одговара тој притисок, не би сакал да живеам без него. Тој притисок најдобро го почувствував пред Супер куп дуелот со Барселона или нешто порано во пресрет на пресметката со Вилјареал. Сфатив дека овде нема шеги и поразот не е опција.

– Но, дури по натпреварот со Ливерпул сфатив што значи Реал Мадрид, односно пресвртите во ЛШ.

– Тоа е лудост, дури и страшно, тие поведоа со 2:0, а на лицата можеше да им се види стравот, нешто не беше нормално. Ние стигнавме до 2:2 и беше јасно дека ќе победиме, на големите натпревари можеш да видиш колку си различен од другите, – изјавил Ридигер.