Ричардс со шампионски предлог до Гвардиола: Доведи го овој слободен агент и твоја е титулата во Премиер лигата!

Диего Коста е во потрага на проект кој ќе ги задоволи неговите амбиции откако самоиницијативно одлучи да стави крај на своајта втора етапа во Атлетико Мадрид, барајќи сам од клубот да му го раскине договорот кој истекуваше во летниот преоден рок.

Незадоволен од статусот во тимот кој е лидер на табелата и нарушените односи со Чоло Симеоне го натераа Диего Коста да побара дозвола за заминување, а клубот брзо му излезе во пресрет и му го додели статусот на слободен агент, ослободувајќи го од сите обврски кон клубот, со специјална клаузула според која не смее да потпише договор со Реал Мадрид, Барселона и Севилја, главните ривали за титулата во Примера.

Според најавите, искусниот напаѓач веќе одбил неколку понуди кои не биле доволно атрактивни за него, а англиските медиуми уверуваат дека всушност чека понуда од Премиер лигата, првенство во кое одлично се снајде и во кое стана шампион со Челси. Таблоидите од Островот потенцираат дека Манчестер Сити ја разгледува опција за можен ангажман на Коста со оглед на проблемите кои Гвардиола ги има во нападот (Кун Агуеро веќе подолго време се мачи со повреди), па со став на оваа тема излезе и поранешниот стопер на „граѓаните“, Мика Ричардс.

– Манчестер Сити влезе во фантастична форма, но ако го донесат Диего Коста, сигурно ќе им ја донесе Премиер лигата. Коста има 32 години и нема да биде долгорочно решение за Сити, но тој е слободен агент во овој момент и може да дојде гратис.

– Тој ќе биде огромна главоболка за противничките одбрани во Премиер лигата, со него, Гвардиола секогаш ќе има план Б и сигурно ќе ја освои Премиер лигата,- тврди Ричардс.