РФМ подготвува ракометен спектакл во „Борис Трајковски“: Проштален меч и славеничка атмосфера пред СП

Македонија ќе игра на Светското првенство кое ќе се одржи во месец јануари, но на самиот старт на новата 2023-та година, македонската репрезентација ќе добие феноменално загревање за големиот настан.

Цела јавност во нашата земја ќе може да ужива во ракометниот спектакл кој го подготвува РФМ, а кој ќе им биде посветен на тројцата големи играчи кои се повлекоа од репрезентативниот дрес на крајот од мундијалските квалификации.

Кире Лазаров, Стојанче Стоилов и Филип Миркуловски се простија од репрезентацијата уште пред неколку месеци, но тоа што беше најавено, сега ќе добие своја реализација.

Планот на ракометната Федерација на Македонија е да се организира ракометен спектакл на 3-ти јануари во „Борис Трајковски“, на кој ќе присуствуваат сите актуелни играчи од репрезентацијата, трите легенди поради кои ќе се игра прошталниот меч, но и поранешни врвни екс ракометари.

Во наредниот период, РФМ ќе излезе со повеќе детали за ова случување, но јасно е дека ќе владее славеничка атмосфера во репрезентацијата и меѓу македонските фанови пред заминување на Светското првенство.