Ретклиф се договорил со Глејзерови, дилот не ги воодушеви фановите на Манчестер Јунајтед

Милијардерот Џим Ретклиф постигнал договор со членовите на фамилијата Глејзер и по претстојната пауза за настапот на репрезентациите, Манчестер Јунајтед официјално ќе го најави влезот на новиот малцински сопственик на акции.

Компанијата „Инеос“ чиј сопственик е Ретклиф ќе плати околу 1,25 милијарди фунти за да добие 25 проценти од акциите на „црвените ѓаволи“, па и покрај тоа што ова е еден чекор нанапред, фановите се далеку од среќни од овој договор.

Глејзерови и натаму ќе управуваат со клубот, со што барем засега останува неисполнета желбата на навивачите за целосно збогување со актуелните сопственици, кои според нив менаџираат лошо со клубот и стадионот кој е во загрижувачка состојба.

Најавите се дека Ретклиф ќе има влијание и во одлуките на спортски план, но нејасно е колку моќ ќе му биде отстапена, па и фактот што ќе има поделена одговорност и нејаснотии кој ги влече потезите е негативна за големата база на фанови.

Теоретски, луѓето на Ретклиф најавија дека желба на милијардерот е да го зголемува својот удел на акции и дека планира да инвестира во инфраструктурата на Јунајтед, но тоа допрва треба да го потврди со своите следни чекори.