Ремек дело на Димарко, дербито во Неапол без победник (ВИДЕО)

Наполи и Интер одиграа без победник 1-1 во дерби натпреварот од 27. коло во Калчо лигата.

Ова беше дуел на двете најдобри екипи во досегашниот дел од шампионатот, битка по која останува предноста од еден бод на Интер на табелата на 11. кола до крајот на натпреварувачката 2024/2025.

Домаќините беа поконретен ривал на ова соочување, повеќе ја имаа топката во своите нозе, испратија повеќе удари, меѓутоа тие беа оние кои се спасуваа од пораз во самата завршница.

Имено Интер испрати само еден удар во рамките на голот и тоа беше оној на Димарко во 22 минута, вистинско ремек дело од слободен удар кое заврши на вистинското место. Избрнаиците на Конте долго се обидуваа да израмнат, а тоа им успеа дури во 87 минута кога резервистот Билинг од втора го матираше Мартинез.