Реднап го омаловажи миленикот меѓу фановите на Јунајтед: Тој не е во иста лига со Анри!

Џејми Реднап со своите 11 минати години на „Енфилд Роуд“ имаше можност да фати една постара и помлада генерација на фудбалери во Премиер лигата, а тоа му овозможува да прави паралела за фудбалерите кои ја одбележаа почетната ера на Премиер лигата по преименувањето во 1992-ра година, и оние во средишницата, односно на почетокот на новиот век.

Реднап немаше многу среќа со повредите и проблемите со честите отсуства не му помогнаа да ја развие кариерата подобро од тоа што го направи, а во последно време, надалеку познат е по своите експертски мислења кои ги дава како аналитичар во студијата на Островот.

Некогашниот капитен на Ливерпул одлучи да направи споредба меѓу Ерик Кантона и Тјери Анри, обраќање при кое значително ја омаловажи огромната ѕвезда на Манчестер Јунајтед и миленик меѓу фановите на овој клуб.

– Кантона создаде чувство на ароганција околу себе, се беше мистериозно за него и се слушаа секакви гласини за него како личност. Знам дека со оваа изјава ќе служам и за потсмев, но имам играно против многу подобри играчи од него, – вели Реднап за „Скај Спортс“.

– Верувајте ми во тоа, иако знаеше да биде голем на натпреварите кои ги играше Јунајтед. Ако го споредиме со некој како Тјери Анри, тој едноставно не е во иста лига со легендата на Арсенал, – завршува Реднап.