Ребров смета дека Украина е ограбена во „финалето“ со Италија: Не ни досудија чист пенал на крајот (Видео)

Украина и Италија играа своевидно „финале“ за пласман на Европското првенство како селекции кои беа дел од нашата група, а на крајот повеќе причини за радост имаа „аѕурите“.

Италија беше таа која во две сценарија обезбедуваше пласман на континенталниот собир, а на крајот стигна до тоа со постресната варијанта, која направи сите фанови на европскиот шампион да стравуваат до последната секунда.

Тимот на Лучијано Спалети беше навистина подобар во првиот дел и не успеа да го материјализира тоа, додека Украина фрли се на една карта во вториот дел, особено во самата завршница од мечот.

Мечот кој заврши 0:0 донесе и една крајно контроверзна одлука од судијата Хил Мансано, од која Украинците се чувствуваат ограбено и оштетено на „Бај Арена“.

Мудрик имаше дуел со Кристанте и се чини дека италијанскиот дефанзивец задоцни со стартот, но сепак Мансано не се огласи, а одлуката не ја поправија и луѓето од ВАР.

– Сметам дека тоа беше чист пенал врз Мудрик. За мене тоа е чист пенал, но тука го имаме ВАР и немаше реакција. Од моја гледна точка, тоа беше чист пенал, но не сме ние тие кои носиме одлуки на теренот. Има луѓе кои ги гледаат овие ситуации и тие не видоа пенал, – изјави разочараниот украински селектор, Сергеј Ребров.

Со ремито во Германија, Украина остана без директен пласман на Европското првенство, но сега и останува уште една карта и ќе брка билет за турнирот преку баражот.

Видеото од спорниот момент погледнете го ТУКА