Реал размислува да им го забрани патувањето на своите играчи на доделувањето на „Златната топка“

Реал Мадрид би требало да биде претставуван на церемонијата на доделување на „Златната топка“ преку дел од своите фудбалери, но клубот не е сигурен дека тоа е најдобра идеја во овој момент.

Џуд Белингам и Винисиус Жуниор се фудбалери кои треба да бидат присутни на свеченоста во Париз, но Флорентино Перез и неговите соработници се исплашени од актуелната ситуација во земјата.

Израелско-палестинскиот конфликт во Газа предизвика бројни закани со терористички напади во цела Франција, па постојано се откажуваат и летови бидејќи аеродромите добиваат дојави за поставени бомби.

Во слична ситуација се и најважните туристички атракции како палатата во Версај, па сето тоа може да ја осиромаши и фудбалската гала церемонија, бидејќи Реал е еден од клубовите кои размислуваат да им забранат патување на своите ѕвезди во Париз.

„Златната топка“ ќе биде доделена на 30. октомври во театарот Шателе.