Реал Мадрид ја пикирал „големата риба“ за следното лето, се работи за играч од Премиер лигата

Флорентино Перез и трансфер стратегијата на Реал Мадрид се покажа како повеќе од успешна и обезбедува тим кој секоја година е меѓу главните фаворити за триумф во Лигата на шампионите и клуб кој станува посакувана дестинација за најголемите ѕвезди.

Шпанскиот великан летово во таков стил го доведе Килијан Мбапе и обезбеди големо засилување за Карло Анчелоти, а веќе ја планира „големата риба“ и за следното лето.

„АС“ тврди дека Перез и неговите соработници го пикирале Родри и по секоја цена ќе инсистираат на ангажман на шпанскиот репрезентативец, кој и оваа сезона ќе биде клучен играч во редовите на Манчестер Сити.

Родри има договор со Сити до 2027 година, што отвора простор за подобра позиција на фудбалерот во преговорите, во случај Родри да ја прифати понудата на Реал Мадрид.

Во таков случај, Шпанецот би пристигнал како зрел фудбалер во „кралскиот клуб“, на возраст од 29 години колку што имаше и Зинедин Зидан кога се пресели во Реал. Агентот на Родри е агент и на клупската легенда Раул Гонзалес и е во добри односи со раководството на европскиот шампион, а уште отсега се почнати контактите со кој се опипува пулсот кај фудбалерот, до кого сигурно ќе стигне и нова и побогата понуда и од Сити.

„АС“ потенцира дека Родри е роден во Мадрид и веројатно не постои друг клуб освен Реал во кој би настапувал ако веќе реши да го напушти Сити. Дури и во случај да не се реализира овој трансфер следното лето, мадридскиот клуб како „утеха“ веќе го има обезбедено потписот на Алфонсо Дејвис, кој ќе дојде како слободен агент, односно без отштета.