Реал Мадрид е загрижен за Винисиус, детектирана и причината за неговата слаба форма

Реал Мадрид вчера одигра второ реми по ред во Ла Лига и веќе заостанува четири бода зад најголемиот ривал Барселона, но она што повеќе го загрижува клубот е слабата форма и говорот на телото на одредени фудбалери.

Тука не се работи толку за Килијан Мбапе, чија мотивација е јасна и порано или подоцна ќе донесе голови за Реал, туку повеќе за Родриго и Винисиус Жуниор.

Вториот од бразилскиот тандем фактички најмногу ги загрижува тренерот Карло Анчелоти и раководството на клубот, кое верува дека причина за актуелниот однос на фудбалерот е богатата понуда од Саудиска Арабија.

Летово, Винисиус доби отворена понуда за годишна плата од неверојатни 350 милиони евра од азиската земја, но иако истата е одбиена, шпанските медиуми тврдат дека Бразилецот само ја одложил одлуката за следното лето, бидејќи смета дека годинава има шанси да конкурира за „Златната топка“.

Родриго делува идентично дефокусирано и е далеку од она што од него го очекува Анчелоти на теренот, па заедно со Винисиус не успеваат да го обезбедат нивото кое го правеше нападот на Реал толку опасен последните сезони.

Информацијата е објавена од „Марка“, па може да се смета за индиректна порака од клубот до бразилскиот тандем, односно доказ дека Реал Мадрид е сериозно незадоволен од нивниот придонес на првите натпревари и бара промени.