Раздвижено во Рим по крајот на трансфер пазарот: По Ермосо, доаѓа уште еден елитен слободен агент

Рома одигра 0:0 против Јувентус и за првпат успеа да ја сочува својата мрежа оваа сезона, нешто што Даниеле Де Роси го посочи како главен проблем на стартот на новата натпреварувачка кампања.

Тренерот на Рома побара од упрвата да му донесе уште еден стопер по завршувањето на летниот преоден рок и Марио Ермосо веќе пристигна во Рим, но покрај поранешниот стопер на Атлетико Мадрид, во престолнината набрзо ќе пристигне уште еден елитен слободен агент.

Како што јавуваат најугледните медиуми од Италија, Рома се согласила да го продаде Крис Смолинг на Ал Фејха, а трансферот на Англичанецот во Саудиска Арабија отвора простор за уште еден нов играч.

Тоа ќе биде искусниот Матс Хумелс, доскорешниот капитен на Борусија Дортмунд кој цело лето чека вистинска понуда која ќе ги задоволи неговите апетити.

Последните информации велат дека попладнево тој ќе пристигне во Рим, по што ќе стави договор на една година, со опција истиот да биде продолжен на уште една.