Раул со порака до Анчелоти: Младинците на Реал заслужуваат повеќе шанси

Раул Гонзалес веќе подолго време работи како прв тренер на младинскиот тим на Реал Мадрид, а како човек кој будно го следи прогресот на младите таленти, смета дека истите не добиваат доволно шанса во првиот тим.

„Кралевите“ се навикнаа да ги имаат најголемите фудбалски ѕвезди во својот прв тим и многу ретко добиваат шанси играчи од „фабриката“, пракса која според Раул треба да се промени, а не да се чекаат екстремни ситуации како оваа во последно време.

Поради огромните повреди во одбрана, Анчелоти му даде шанса на талентираниот Асенсио на последниот меч со Осасуна, а откако одговори навистина добро на теренот, се очекува младиот стопер да биде прекомандуван во првиот тим.

– Сите сме радосни за Асенсио. На последниот меч доби голема шанса и одигра одлично. Во наредниот период ќе биде еден плус во првиот тим и навистина се радувам за тоа. Се бореше со години за да дојде до тука и до оваа позиција. Сега мора да продолжи храбро, дел од работата ја заврши, но сега треба да се задржи во првиот тим.

– Младинскиот тим на Реал е подготвен, едноставно недостасуваат шанси за младите играчи. Во други клубови добиваат многу повеќе шанса од Реал, а јас сметам дека во Мадрид ја имаме најдобрата школа во светот. Ако не успеат да ја остварат целта во првиот тим на Реал, сигурен сум дека ќе го направат тоа на други страни ширум светот, – вели Раул.