Расте одговорноста: Буфон доби нова улога во италијанската репрезентација

Џанлуиџи Буфон го наследни легендарниот Џанлука Вијали и стана тим менаџер на италијанската фудбалска репрезентација, но за разлика од легендарниот напаѓач кој за жал почина во 2023-та година, Џиџи изминатава година е десна рака на Лучано Спалети.

Буфон пристигна во националниот тим за да биде тесната врска меѓу селекторот и играчите во репрезентацијата, но сега италијанската Федерација му додели уште една нова улога на неповторливиот голман.

Како што јавуваат најугледните медиуми од Апенините, Буфон ќе има дополнителни одговорности во блиска иднина, односно ќе биде и „референтен директор“ на италијанскиот фудбалски тим.

Новата улога се уште не е целосно дефинирана и ќе треба подетално да се кристализира, но во прв момент, Буфон ќе биде главен контакт меѓу националниот тим и клубовите и тренерите од Серија А.

Буфон ќе биде постојана врска меѓу двете страни и ќе запишува забелешки за формата, фитнес состојбата и достапноста на фудбалерите, а оваа нова улога му била доделена од стартот на овој септемвриски прозорец.