Раниери со оригинална порака до тифозите го потврди враќањето во Рома

Клаудио Раниери и дефинитивно се враќа од пензија и прифатил да биде тренер на Рома, информација која и самиот ја потврдил во краток разговор за новинската агенција „АНСА“.

Искусниот 73-годишен стручњак потврдил дека се враќа со позитивни вести од Лондон, па веќе утре ќе го води и првиот тренинг во својата трета етапа како тренер на Рома.

Медиумите претходно открија дека Клаудио го прифатил најважниот услов на Дан Фридкин и се согласил да го води тимот до крајот на сезоната, без опција истиот да биде продолжен на почетокот на летото.

Раниери го прифати повикот од клубот кој посебно го сака и поради Рома ја прекина пензијата која ја објави пред само неколку месеци, а во краткиот разговор за „АНСА“, не пропуштил шанса да испрати порака и до тифозите од Рим.

– Ме чека тешка задача? Поради тоа добив повик од Рома, поради тоа што ситуацијата е тешка. Порака за фановите? Бидете подготвени, доаѓа коњаницата, – се огласил Раниери, потсетувајќи на фраза позната за вестерн филмовите.