Раниери откри зошто го закова за клупа капитенот на Рома

Клаудио Раниери ја запиша првата победа во својот трет мандат како тренер на Рома, но тоа го направи без да му даде ниту една минута на капитенот на првиот тим.

Лоренцо Пелегрини повторно остана неискористена измена на трет меч во низа и тоа веќе предизвика големи реакции во јавноста, па новинарите се обидоа да дознаат што се случува со искусниот играч за врска.

Со оглед на тоа што Раниери посебно го фалеше Пелегрини по враќањето во Рим, игнорирањето на последните три натпревари предизвика конфузија на чизмата, па искусниот стручњак даде кратко објаснување по убедливата победа која ја оствари Рома над Лече со резултат 4:1.

– Кога се вратив тука го кажав ова, а ќе го кажам повторно. Во мојата кариера работев со двајца извонредни голгетери од средниот ред, а тоа се Лампард и Пелегрини.

– Сепак, фудбалот носи подеми и падови, а Пелегрини минува низ тежок период и чувствува тага во себе. Целиот притисок од Рома падна врз него и тоа не е во ред. Кога ќе го видам како се смее и како игра со леснотија, тогаш ќе го видите повторно на теренот, – изјави Раниери.