Ракометарките со пораз од Франција го започнаа ЕП

Женската ракометна репрезентација на Македонија доживеа пораз од Франција од 24-14 во првиот меч на Европското првенство.

Избраничките на Љубомир Савевски влегоа со голема желба во овој меч, но толку тие воведни минути се покажаа како пресудни фаворитот да дојде до резултатот што го посакуваше, односно си го отвори патот до победата во СЦ „Борис Трајковски“.

Имено ние првиот гол го дадовме дури во 15 минута за намалување на предноста на гостинките на 5-1. Беше тешко да се брка оваа негатива особено затоа што расположена беше голманката Дарло, па на паузата заминавме со негатива од 12-5.

Во вториот дел бевме поефикасни во нападот, противникот пак одново го задржавме на 12 голови што е позитивно ако се земе предвид дека станува збор за селекција од највисок калибар, селекција која треба да се бори за медали на шампионатот.

Најефикасна во репрезентацијата на Македонија беше Моника Јанеска со пет погодоци, по три постигнаа Сара Ристовска и Јована Саздовска. Кај победникот Корел Ласурс јапредводеше листата на стрелци со четири погодоци.

Во следното коло на 7 ноември се соочуваме со Холандија.