Рафиња во елемент: Овој натпревар покажа едно нешто

Рафиња игра во најдобра форма откако е член на Барселона и за првпат во кариерата постигна хет-трик, учинок со кој сосема заслужено беше избран за играч на мечот против Валјадолид.

Покрај трите гола, Рафиња придодаде и една асистенција во убедливата победа од 7:0 над Валјадолид, триумф по кој Бразилецот смета дека треба да се прекинат со сите гласини дека овој тим на Барселона нема доволно ширина за да се бори за највисоки дострели.

Барса денеска изгледаше страшно и се избори за „четири од четири“ на стартот на новата сезона во Ла Лига, што дефинитивно укажува на тоа дека Ханси Флик нависитна добро ги подредил коцките во летниот подготвителен период.

– Не знам дали ова е мој најдобар меч во кариерата, но сигурно еден од најдобрите. Многу сум среќен, ова е прв хет-трик во мојата кариера, среќен сум што им помогнав на соиграчите. Се чувствувам добро, работам напорно откако се вратив од одмор. Знаев дека оваа сезона е многу важна за мене и се обидувам да се прикажам во најдобро светло.

– Овој меч денеска покажа едно нешто. Покажа дека не е потребно да дојдат нови засилување и нови играчи во Барселона. Тимот изгледа многу добро, работиме напорно и резултатите доаѓаат сами по себе. Секогаш се обидуваме да дадеме што е можно повеќе голови, но тоа го правиме со максимален респект кон противникот, – изјави Рафиња.