Работнички и Академија ремизираа, Силекс го издржа силниот налет на Шкендија

Осмото коло во македонскиот фудбал донесе дерби пресметка во Тетово, во која Шкендија и Силекс на крајот одиграа нерешено и ги поделија бодовите.

Далеку позадоволни од ваквото сценарио секако се гостите од Кратово, кои повеќе од 30 минути играа со играч помалку на теренот, а во кои вистински херој беше голманот. Божиновски имаше неколку фантастични реакции и сосема заслужено го понесе епитетот играч на натпреварот, одбивајќи ги сите налети на домашниот тим кој средбата ја заврши со четири напаѓачи.

Инаку, натпреварот заврши 1:1, а головите беа постигнати во првото полувреме во кое Ибраими погоди за 1:0, а Ѓуриќ израмни пред крајот на првиот дел.

Од останатите средби, за издвојување е победата на Шкупи со новиот тренер, натпревар на кој чаирчани го победија Борец со 3:0 и ја прекинаа одличната низа на велешани. Два гола постигна Дарбо, а еден беше дело на Адеми.

Во Скопје се играше фудбал и на националната арена, на која Работнички и Академија Пандев одиграа средба без голови (0:0), а реми исход имаше и на дуелот меѓу Беласица и Ренова (1:1).

Покрај Шкупи, ова попладне на победа се израдува и Македонија Ѓорче Петров која на домашен терен славеше над Струга со 2:0.