Пушкаш, Пантиќ…Мбапе: Само девет фудбалери постигнале хет-трик на „Камп Ноу“

Големата победа на ПСЖ на гостувањето кај Барселона беше одбележана со хет-трикот на Килијан Мбапе, кој повторно ја докажа својата класа и на „Камп Ноу“.

Францускиот првак има голема предност во пресрет на реваншот од осминафиналето на Лигата на шампионите, а Мбапе влезе во историјата како еден од ретките играчи кои постигнале три погодоци на официјален натпревар на стадионот на Барселона.

Тоа им успеало само на уште осум фудбалери, а последен беше Диего Форлан, кој постигна хет-трик на „Камп Ноу“ во натпревар од Ла Лига во 2005 година.

Претходно, Андриј Шевченко погоди три пати во 1997 година во рамките на Лигата на шампионите, а истото му успеа на Милинко Пантиќ, кој во натпревар од купот постигна четири голови во дресот на Атлетико Мадрид.

Хет-трик на „Камп Ноу“ постигнале и Балтазар (Атлетико Мадрид) во куп натпревар во 1989 година, Мануел Пења (Валјадолид) во 1987 година, Тони Курбош (Мец) во натпревар од КПК во 1984 година, како и легендарните Ференц Пушкаш (1963) и Луис Арагоњес (1961).