Пулишиќ и Мората во еден глас: Сакаме нова победа над Интер и титула во Супер Купот

Милан излезе како победник од пресметката со Јувентус (2-1) и ќе има можност да се бори за првиот трофеј во сезоната 2024/2025 и тоа во Супер Купот на Италија.

„Росонерите“ со пресврт во вториот дел ги решија „бјанкоонерите“, па водени од овој резултат и зголемената самодоверба се надеваат, веруваат дека во финалето можат да го надиграат Интер и дојдат до пехарот на турнирот што е игра во Саудиска Арабија.

-Ние сме во финалето, ова е резултат на големиот тимски дух. Првото полувреме не беше толку добро, но ќе го земеме. Овие 100 проценти ни даваат самодоверба да одиме напред. Сакаме да ја повториме нашата победа против Интер, дури и ако тие се одличен тим, -порача Кристијан Пулишиќ.

Исто размислува и напаѓачот Алваро Мората.

-Како и со секој трофеј, никогаш не се знае кога ќе биде вашата последна шанса, секогаш мораме да го имаме тој менталитет. Кога влегуваме во Миланело секој ден, ги гледаме имињата на сите трофеи што Милан ги има освоено и имаме можност да додадеме уште една страница од историјата во тој клуб. Мора да дадеме се од себе -подвлече Шпанецот.

Финалето е закажано за в понеделник од 20 часот.