ПСЖ со фуриозно прво полувреме го доби дербито во Лига 1 (Видео)

Последниот меч оваа сабота во Лига 1 беше големото дерби меѓу ПСЖ и Ленс, тимовите кои влегоа во овој меч како најдобро два пласирани на табелата.

Ленс сериозно се разигра во последно време и успеа да ги искористи неколкуте кикса на „светците“, но вечерва едноставно потклекна на мечот кој многумина го окарактеризираа како клучен за титулата.

Абдул Самед ги остави своите соиграчи на цедило уште во 19-та минута и поради остар старт над Хакими доби исклучување, по што следуваше фуриозна завршница на првиот дел од страна на домаќинот.

ПСЖ успеа да постигне три гола во период од девет минути, со тоа што оној последниот беше вистинско ремек-дело во кое учествуваа двајцата фудбалски генијалци Лео Меси и Килијан Мбапе.

Аргентинецот ја заврши акцијата по извонредното додавање од Французинот, а претходно и тој се запиша во листата на стрелците и погоди за 1:0 во 31-та минута. Во меѓувреме гол постигна и Витиња, додека конечните 3:1 во вториот дел ги постави Франковски од белата точка.

Со оваа победа, ПСЖ направи голема предност на табелата и сега има 11 бода повеќе од Ленс.