ПСЖ не крие дека го сака Меси: Големи играчи како него секогаш се на нашиот список

Лионел Меси е во последните месеци од актуелниот договор со Барселона, а тоа значи дека сите опции се отворени како и можноста да си замине од „Камп Ноу“ по крајот на сезоната.

Еден од клубовите кој во изминативе месеци најчесто се поврзува со Аргентинецот е Пари Сен Жермен. Французите досега не сакаа премногу јавно и искрено да говорат на оваа тема, меѓутоа како што минува времето станува се појасно дека го посакуваат Меси, а најдобар доказ за тоа е последната изјава на спорскиот директор на „светците“.

–Одлични играчи како Меси секогаш ќе бидат на списокот на ПСЖ. Но, секако не е време да се зборува за тоа, или да се сонува за тоа. Ама ние сме седнати на големата маса на оние клубови кои внимателно ја следат работата. Всушност, не, ние сè уште не сме седнати, но нашиот стол е резервиран за секој случај. Четири месеци во фудбалот се вечност, особено во овој период, -рече Леонардо притоа говорејќи за Нејмар и Килијан Мбапе, поточно дали ќе останат во сегашната средина.

-Се надевам дека се убедени дека ПСЖ е добро место во моментов за многу високо ниво и амбициозен фудбалер. Треба само да најдеме договор помеѓу нивните желби, нивните барања, нашите очекувања и нашите средства. Не мора да ги молиме: „Те молам остани“. Се дискутира повеќе од тоа. Оние што навистина сакаат да останат, ќе останат. Ние редовно разговараме и имам добри чувства за овие две прашања, -истакна Бразилецот за „Франс Фудбал“.