Прво засилување за каталонците: Барселона договори шпански репрезентативец за 55 милиони евра

Барселона е една од најнеактивните шпански екипи во досегашниот дел од летниот преоден рок, меѓутоа тоа се очекува да се промени како што ќе се ближи крајот на овој „прозорец“ со тоа што последните вести говорат дека конечно клубот активирал „трансфер бомба“.

Барса долго време го посакуваше, инсистираше да го добие потписот на Нико Вилијамс од Атлетик Билбао, ама иако долго време го чекаше не го доби одговорот кој сакаше да го слушне затоа што играчот на крајот се реши да остане во Баскија.

По ова стана јасно дека ќе се тргне интензивно по друго име, играч кој беше втор на листата-тоа е Дани Олмо од РБ Лајпциг.

Деко како главен оперативец не можеше да дозволи да пропадне и оваа зделка, па последните вести се дека соиграчот на Елиф Елмас доаѓа на „Камп Ноу“ или поточно се враќа дома со оглед на тоа што е дете на Барселона.

Фабрицио Романо изнесе детали од целата операција, „биковите“ ќе добијат загарантирани 55 милиони евра, а во игра се уште 7 милиони евра кои тешко се остварливи.

Играчот ќе потпише договор до 2030 година.

Дани има 26 години и ако ги избегне повредите дефинитивно може да биде еден од носителите на играта на шпанскиот великан во следниов период.