Првиот ден донесе сензација на Ју-Ес Опен: Потенцијалниот ривал на Ѓоковиќ во полуфиналето доживеа шокантна елиминација

Првиот натпреварувачки ден на Ју-Ес Опен се очекуваше да биде мирен за сите фаворити во воведната дневна програма, но така не мислеше Роберто Карбалјес Баена кој за првпат во својата кариера оствари победа над топ десет тенисер.

Холгер Руне беше поставен како четврти носител и според програмата требаше да се соочи со Новак Ѓоковиќ во полуфиналето, меѓутоа неговиот пат на американскиот грен слем заврши уште во воведното коло.

Младиот Данец не играше баш најдобро на последните два турнири, а лошата форма ја продолжи и денеска и доживеа тежок пораз од Шпанецот кој е 63-ти на АТП листата.

Според проценките, Руне беше главен фаворит да го предизвика Новак во полуфиналната фаза, но ждребот за Србинот почна да се чисти уште сега и патот до финалето му станува уште полесен.

Мечот траеше 2 часа и 38 минути, а Баена најголемата победа во кариерата ја оствари со резултат 6:3, 4:6, 6:3 и 6:2.

Roberto Carballes Baena da la campanada 🔥 pic.twitter.com/4FXyQgXFB3

— US Open Tennis (@usopen) August 28, 2023