Првиот човек на Интер: Му покажавме на Сити колку сме силни

Интер ги надмина очекувањата на сите неутрални фудбалски експерти и се прикажа во извонредно светло во финалето во Истанбул, но сепак остана пократок во дуелот со Манчестер Сити и не стигна до четврта европска титула.

Тимот на Симоне Инѕаги не беше луциден во клучните моменти од натпреварот и не ги искористи своите шанси, но дефинитивно најголема беше онаа на Ромелу Лукаку во 88-та минута.

По добриот скок на Госенс и проигрувањето со глава, Лукаку непречен од никого можеше да ја смести топката во голот, но го погоди само Едерсон и ја упропасти златната шанса во финалето.

Играчите и навивачите на Интер со солзи во очите го завршија финалето во Истанбул, па затоа по натпреварот пристигна поддршка од претседателот Стивен Жанг.

– Прво и основно, сакам да му честитам на Манчестер Сити, тие имаа неверојатна сезона. Истовремено, сакам да истакнам дека не можам да бидам погорд на овие играчи, на тренерот и стручниот штаб. Вечерва со овие перформанси, му покажавме на Сити колку сме силни, но покажавме и на цел свет. Пред натпреварот, сите не посочуваа како аутсајдери, но во финалето покажавме дека сме многу силни и дека се натпреваруваме на највисоко ниво. Не можам да бидам погорд на оваа група.

– Оваа сезона е добар патоказ за нас, секогаш има простор за напредок. Оваа сезона ни покажува дека треба да продолжиме напорно да работиме. Горди сме на сите кои се дел од Интер, – изјави Жанг.