Првиот човек на Атлетик со критики за Барселона: Ова носи негативни поени за фудбалот

Барселона вчера го совлада Атлетик Билбао и обезбеди финале во шпанскиот Суперкуп, но една информација која пристигна во пресрет на натпреварот донесе многу реакции во шпанската фудбалска јавност.

Иако, Каталонците не успеаја да ги регистрираат Дани Олмо и Пау Виктор според правилата на Ла Лига и Шпанската фудбалска федерација, Барселона успеа да добие привремена забрана на таа одлука од страна на највисокиот спортски суд во земјата.

Тоа значи дека Олмо и Виктор ќе бидат во конкуренција за финалето, а фудбалските авторитети во земјата ќе мора да го докажуваат својот правичен став во наредниот период. Поради ваквото сценарио, уште пред вчерашното полуфинале реагирал и претседателот на Атлетик, Јон Уриарте.

– Се работи за привремена мерка донесена од политички субјект, па лигата и федерацијата ќе треба да ја бранат својата одлука.

– По само осум дена во новата година веќе се соочуваме со неверојатна ситуација, направивме толку напори за да играме далеку од дома, а ни се случува вакво нешто.

– Ситуација како оваа не смее да се случи бидејќи носи само негативни поени за фудбалот, – рекол Уриарте.