Прв бод во квалификациите: Надежите ремизираа со Србија во Охрид

Македонската репрезентација до 21 година одигра без победник против Србија (0-0) во денешниот натпревар од квалификациите за Европското првенство во 2023 година.

Средбата која се одигра на стадионот на СРЦ „Билјанини извори“ во Охрид иако заврши без голови донесе возбудувања на двете страни, меѓутоа не се тресеа мрежите на Денковски и Гордиќ. Во првиот дел поконретни беа гостинските играчи, но Денковски беше на висината на задачата со тоа што посебно се истакна во 36 минута во која имаше двојна интервенција, прво пеналот на Тедиќ, потоа и одбиената топка која ја упати Милосављевиќ.

Вторите 45 минути минаа во поизедначена игра, а избраниците на Канатларовски можат да жалат за нереализираните шанси особено во финишот кога Трајковски и посебно Елези кои мораа многу подобра да реагираат.

Следниот дуел за нашите надежи е во октомври на гостински терен против Фарски Острови.