Промотерите на „Супер лигата“ преговараат со 50 клубови од Европа

Додека Јувентус има проблеми со драстичната казна во својата земја, Реал Мадрид и Барселона ги продолжуваат активностите со промоција на проектот Супер лига, пренесува „Лекип“.

Шпанските клубови преку агенцијата промотер на натпреварувањето веќе се во отворени преговори со 50 клубови од 12 земји, подготвувајќи турнир со формат кој ќе биде поразличен од првично објавениот.

Идејата е да се понуди место во новото натпреварување, но и да се слушнат мислењата на клубовите околу планираните правила за учество, со што би се создала важна база поддржувачи кои нема да бидат поврзани со англиските клубови.

„Лекип“ пренесува дека форматот предвидува и селари-кап ограничувања во однос на платите за фудбалерите, како и други правила кои ќе функционираат подобро од актуелниот финансиски фер-плеј на УЕФА.

Европскиот суд допрва треба да ја донесе одлуката по конфликтот меѓу УЕФА и основачите на Супер лигата, но во најлош случај УЕФА ќе има право да ги исфрли клубовите од своите натпреварувања, што би било компензирано со подготвена Супер лига со учество на голем број екипи од Европа.