Проблем за Пиоли: Леао нема да биде подготвен за можеби најважниот натпревар во ЛШ

Милан го очекува комплетирањето на интернационалците и фокусирање на натпреварот со Фиорентина во Серија А, но тренерот Стефано Пиоли добил лоша вест од лекарскиот тим.

Повредата која Рафаел Леао ја заработи на дуелот со Лече и натаму е проблем за Португалецот, а најновата проценка е дека тој нема да биде подготвен за дуелот со Борусија Дортмунд во Лигата на шампионите.

Стручниот штаб на Милан беше свесен дека Леао нема да игра против Фиорентина, но се надеваше дека ќе го добие Португалецот за веројатно одлучувачката пресметка со Борусија на домашен терен.

Натпреварот е закажан за 28. ноември, а „росонерите“ мора да размислуваат за победа, бидејќи сите четири екипи се со шанси за пласман во нокаут фазата.

Милан претходно ја пречекува Фиорентина, а на оваа средба покрај Леао, ќе го нема и Оливие Жиру, кој заработи суспензија по црвениот картон против Лече.