Проблематичниот Мир добил привремена забрана да тренира со соиграчите од Валенсија

Рафа Мир ја шокираше јавноста откако беше уапсен со обвинение за сексуално насилство, а реакцијата на полицијата и потенцијалниот судски процес сигурно ќе влијае негативно на неговата фудбалска кариера.

Соиграчот на нашиот Столе Димитриевски во Валенсија е обвинет заедно со свој пријател за сексуално насилство на две девојки и тоа за време на забава која фудбалерот ја организирал во својата куќа.

Мир во меѓувреме е ослободен од полицијата и ќе очекува епилог на целиот случај од слобода, но Валенсија побарала од него засега да не се појавува во тренинг центарот на клубот.

Тренерот Рубен Бараха им дал и слободен викенд на своите фудбалери, што значи дека Мир нема да може да тренира пред понеделник, а прашање и дали раководството на Валенсија нема да ја продолжи мерката за претпазливост со својот фудбалер.

Мир настапува како позајмен играч од Севилја и е еден од играчите без обврски кон националниот тим, за разлика од Димитриевски кој ќе настапува со Македонија во Лигата на нации.