Проблем за Интер пред важните пресметки со Сити и Милан

Интер иако важеше за апсолутен фаворит не успеа да ги освои трите бода на гостувањето кај Монца во меч во кој се спасуваше од пораз во 88 минута.

Актуелниот шампион покажа одредени слабости кои сигурно ќе мора да ги корегира, елиминира затоа што следат важни натпревари против Манчестер Сити и Милан. Ова се средби во Лигата на шампионите и Серија А, средби за кои тренерот Симоне Инѕаги најверојатно нема да може да смета на стандардниот Федерико Димарко.

Димарко го заврши вчерашниот меч против Монца, но според италијанските медиуми заработил и повреда поради која ќе мора да паузира.

„Тутоспорт“ пренесува дека се работи за мускулот на десната нога и дека сигурно Италијанецот ќе го пропушти соочувањето со Сити.

„Скај Спорт Италија“ пак информира дека Федерико виси и за градското дерби со „росонерите“ што ако е вистина тоа ќе биде хендикеп за „нероаѕурите“.