Прилепчани организираа ревијален шаховски турнир по повод 76-годишнината од основањето на федерацијата

По повод 76 години од основањето на Шаховскиот сојуз на Македонија, а на иницијатива на ШК Прилеп, НУ Завод и музеј Прилеп, како и КЕЦ „Небрегово“, заеднички организираа меморијален турнир во шах на кој учество зедоа неколку реномирани екипи од Македонија.

Турнирот се одржа во с. Небрегово во родната куќа на првиот претседател на ШСМ, академик Блаже Конески – основоположник и кодификатор на македонскиот литературен јазик кој е душата на еден народ, дел од културната меморија и стожер на идентитетот. Македонскиот јазик, литература и култура Конески го промовираше и негуваше насекаде низ светот.

Само за потсетување Блаже Конески бил голем љубител на шахот и настапил на првиот екипен шампионат на Југославија во далечната 1946 година играјќи за екипата на Работнички при што ремизирал против велемајсторот Александар Матановиќ еден од најдобрите југословенски шахисти. Настапот во полуфиналето на Југославија бил негов прв и последен официјален настап на едно напреварување. Поради неговата голема љубов и посветеност кон шахот, во 1948 година на изборното собрание Блаже Конески бил избран за прв претседател на Шаховскиот сојуз на Македонија. Според кажувањата на постарите љубители на шахот бил многу ревносен како претседател, но поради обврските на факултетот и писателската дејност по неколу години се повлекол од функцијата и и дал предност на литературата.

На ревијалниот турнир во чест на великанот Конески заслужено победи екипата на ШК Шах Шех од Битола, пред ШК Штајниц од Битола и ШК Прилеп.

Со ваквите потези прилепчани уште еднаш ја засрамија федерацијата која самата не ги чествува своите значајни денови, како и великани на шахот.