Премиерлигашки фудбалер не играл за националниот тим затоа што го загубил пасошот

Најквалитетните фудбалери на планетата периодов имаат обврски кон своите репрезентации, но еден од нив нема по добро да го памети ноемврискиот прозорец за настап на репрезентациите.

Се работи за напаѓачот на Вест Хем, Мајкл Антонио, кој ги пропушти двете средби од КОНКАКАФ Лигата на нации за селекцијата на Јамајка.

Антонио требаше да биде важен играч во составот на искусниот Стив Мекларен за двомечот со САД, но откако првиот дуел го пропушти поради суспензија, утринава не бил во комбинација затоа што го загубил пасошот.

Американците славеа со 4:2, а Антонио и неговиот колега Кахијм Диксон ги загубиле пасошите, па немало доволно време да им се изработат нови и да добијат визи.

САД ја оправда фаворитската улога и си обезбеди полуфинале во натпреварувањето, како и директен пласман на Голд купот, додека Јамајка ќе треба да игра квалификации.